"“Bu alçaq hücum Türkiyənin terroru yox etmək əzmini daha da gücləndirib".
Mia.az Türkiyə mətbuatına istinadla xəbər verir ki, bu barədə Prezident Rəcəb Tayyib Ərdoğan BRİKS Liderlər Zirvə toplantısında çıxışında deyib.
Ərdoğan deyib: "Dəyərli dostum, Rusiya Federasiyasının Prezidenti cənab Vladimir Putinə qonaqpərvərliyinə və dəvətinə görə təşəkkür etmək və onu uğurlu ev sahibliyinə görə təbrik etmək istəyirəm. Yanvar ayından etibarən müddətli prezidentliyə başlayacaq braziliyalı dostlarımıza uğurlar arzulayıram.
Dünən Ankarada törədilən xain terror aktına görə başsağlığı verən bütün dostlarımıza həmrəyliklərinə görə təşəkkür edirəm. Bu alçaq hücum Türkiyənin terroru yox etmək əzmini daha da gücləndirdi. İqtisadiyyatdan təhlükəsizliyə, qlobal ədalətsizliklərdən iqlim dəyişikliyinə qədər hər sahədə təsiri hiss olunan ciddi problemlərlə qarşılaşırıq. Bu səbəbdən sammit üçün müəyyən edilmiş ədalətli qlobal inkişaf və təhlükəsizlik üçün çoxtərəfliliyin gücləndirilməsi mövzusunu son dərəcə məqsədəuyğun sayırıq. Bu məqamı incəliklə vurğulamaq istərdim. Ki, qüvvələr balansının dəyişdiyi bugünkü şəraitdə hazırkı siyasi və maliyyə mexanizmləri onlardan gözlənilənləri verə bilmir. Türkiyə olaraq belə bir mühitdə "Daha ədalətli bir dünya mümkündür". şüarı ilə hərəkət edirik. Biz çoxtərəfli platformalarda dostlarımızla bir araya gəlməyə və hamımızı narahat edən ümumi problemlərə sağlam düşüncə ilə həll yolları tapmağa əhəmiyyət veririk. Biz inanırıq ki, BRICS davamlı inkişafa böyük töhfəər verəcək.
Türkiyə Avropa Şurasından Türk Dövlətləri Təşkilatına qədər bir çox beynəlxalq təşkilatların, eləcə də İnkişaf etməkdə olan Səkkiz Ölkə, İqtisadi Əməkdaşlıq Təşkilatı və Qara Dəniz İqtisadi Əməkdaşlıq Təşkilatı kimi regional təşkilatların qurucu üzvüdür. Biz həm də G20 və Mikta-nın fəal üzvüyük. Afrika İttifaqı və ASEAN ilə tərəfdaşlığımızla yanaşı, Latın Amerikası və Karib hövzəsi Dövlətləri Birliyi ilə əməkdaşlıq mexanizmlərimiz gündən-günə təkmilləşir. Türkiyə olaraq, qarşılıqlı hörmət və qazan-qazan əsasında sıx əlaqələr qurduğumuz BRİKS ailəsi ilə dialoqumuzu davam etdirmək əzmindəyik".
Ərdoğan daha sonra İsrailin hücumlarından danışıb: "Fələstin xalqı Qəzzada soyqırımına məruz qalır. İsrail Livana hücum edərək vəhşiliklərini daha da irəli apardı. XXI əsrdə bu bəşəri faciəyə məhəl qoymamaq heç kimi məsuliyyətdən azad edə bilməz. 1967-ci il sərhədlərinə əsaslanan və paytaxtı Şərqi Qüds olan müstəqil, suveren və coğrafi cəhətdən inteqrasiya olunmuş Fələstin dövlətinin yaradılması regionda daimi və ədalətli sülhün təmin edilməsi üçün zəruri şərtdir".
Lamiyə Əhmədli
MİA.AZ
