Rusiya–Ukrayna müharibəsi: mövqe döyüşləri davam edir

Son günlər Ukraynanın Donetsk vilayətinin Avdeyevka kəndi ətrafında gərgin döyüşlər gedir. Hər iki tərəfin ağır itkilər verdiyi bildirilir. Məlumatı UNİAN agentliyi yayıb. 
Bütövlükdə, hansısa bir tərəfin cid­di irəliləyişə nail olması hiss olunmur. Hərbi mütəxəssislər cəbhədə əsasən mövqe döyüşlərinin getdiyini vurğula­yırlar. Bu, ona dəlalət edir ki, rəqiblər ağır itikilərə yol verməkdən çəkinirlər. 
Qarşıdan isə şaxtalı qış günləri gə­lir. Artıq Ukraynada temperaturun kəs­kin aşağı düşməsi müşahidə olunur. Bu amil də geniş hərbi əməliyyatların aparılmasına maneçilik törədir. 
Bu arada dünən Maltada Ukray­naya dair üçüncü sülh sammitinin işə başladığı barədə xəbərlər yayılıb. Təd­birdə dünyanın 65-dən çox ölkəsinin təmsilçisi iştirak edir. Ukrayna Prezi­denti ofisinin rəhbəri Andrey Yermak “Telegram”da bildirib ki, sammitdə Qərb və Qlobal Cənub ölkələrinin xa­rici siyasət və milli təhlükəsizlik üzrə müşavirləri iştirak edir. 
Yermak, həmçinin qeyd edib ki, üçüncü sammitdə Ukrayna sülh formu­lunun beş maddəsinin icrası planları təqdim olunacaq və müzakirə ediləcək: nüvə, enerji və ərzaq təhlükəsizliyi, hu­manitar istiqamət (əsir və deportasiya olunan şəxslərin azad edilməsi), Uk­raynanın ərazi bütövlüyünün və dünya nizamının bərpası. “Bu planlar müxtəlif ölkələrin səfirliklərinin təmsilçilərinin, eləcə də beynəlxalq ekspertlərin daxil olduğu işçi qruplar tərəfindən hazırla­nıb”, – deyə Andrey Yermak yazıb.
Xatırladaq ki, bundan əvvəlki iki görüş Kopenhagendə və Ciddədə ke­çirilib. O vaxt Ukrayna təkcə birbaşa tərəfdaşları və müttəfiqləri deyil, həm də Ukraynaya dair neytral mövqe tutan Qlobal Cənub ölkələrinin təmsilçilərini cəlb etməyə müvəffəq olmuşdu.
Avropanın bəzi ölkələrinin Ukray­naya hərbi yardımları dayandırmaq fik­rində olduqları barədə məlumatlar da yayılır. Lakin Böyük Britaniya hökuməti rəsmən elan edib ki, Fələstin–İsrail müharibəsinə baxmayaraq, London Ki­yevə dəstəyini dayandırmayacaq. 
Belə ki, Birləşmiş Krallığın hö­kumət başçısı Rişi Sunak ilə Ukrayna Prezidenti Volodimir Zelenski arasın­da telefon danışığı olub. Britaniya hö­kumətinin başçısı Ukraynanın ərazi bütövlüyü və suverenliyi məsələsində ölkəsinin sarsılmaz öhdəliyini qeyd edib. 
Rişi Sunak və Volodimir Zelenski, həmçinin Ukraynada hərbi əməliyyat­ların gedişini, kritik infrastrukturun mü­dafiəsi və taxıl ixracı məsələlərini də müzakirə ediblər.
XQ