Hücumçu Kristiano Ronaldo ilə Erik ten Haq arasında “Mançester Yunayted”də birdə çalışdıqları dövrdəki münaqişənin təfərrüatı ortaya çıxıb.
Arena.az bu barədə ESPN şəbəkəsinə istinadən məlumat verir.
Mənbənin məlumatına görə, “qırmızı şeytanlar”ın bir çox futbolçusu Ronaldonun 2022/2023-cü illər mövsümündə “Tottenhem”lə Premyer Liqanın 12-ci tur oyununda (2:0) əvəzedici kimi meydana çıxmaqdan imtina etməsini yanlış addım hesab edib. Amma sonradan futbolçular məşqçilər qərargahının Ronaldonun davranışına qarşılığını da hədsiz hesab ediblər.
Bildirilir ki, Ronaldo imtinasına görə əsas komandadan uzaqlaşdırıldıqdan sonra əşyalarını götürmək üçün paltardəyişmə otağına keçmək qərarına gəlib, amma klubun işçiləri onu içəri buraxmayıblar. Ronaldo ancaq içəri girmiş və portuqal ulduzun əşyalarını götürmüş bir akademiya oyunçusunun köməyi ilə “boxçasını” geri ala bilib. Bir çox komanda veteranları bu davranışı Ronaldunun alçaldılması kimi qəbullanıblar.
Kristiano Ronaldo 2023-cü ilin yanvar ayından “Əl-Nəsr”də çıxış edir. Portuqal ulduz ərəb klubuna 2023-cü ilin yanvarında “Mançester Yunayted”dən azad agent qismində keçib. Ronaldonun “Əl-Nəsr”lə müqaviləsi 2025-ci ilin iyun ayının sonuna qədər qüvvədədir.
Cari mövsümdə Ronaldo “Əl-Nəsr”in heyətində 12 oyuna 9 qol və 3 məhsuldar ötürmə ilə fərqlənib. Kristianonun “Əl-Nəsr” karyerası ümumilikdə 76 oyun, 67 qol və 18 məhsuldar ötürmədən ibarətdir.
Ronaldo “Əl-Nəsr”dən öncə “Real”, “Mançester Yunayted”, “Yuventus”, “Sportinq” (Lissabon) komandalarında çıxış edib. Portuqal ulduz bu komandaların hər biri ilə çoxsaylı qənimətlər qazanıb, müxtəlif rekordlara imza atıb. Ronaldo “Əl-Nəsr”lə də Ərəb Klublarının Çempionlar Kubokunu (2023) qazanıb, həmçinin Səudiyyə Ərəbistanı Peşəkar Liqasının 2023/2024-cü illər mövsümünün ən sərrast qolçusu (35 qol) olub.
Kristiano Portuqaliya yığmasının heyətində 216 oyuna 133 qol vurub və 45 məhsuldar ötürmə verib. Ronaldonun yığma komandanın heyətindəki oyun və qol sayı mütləq dünya rekordudur.
Ulduz futbolçu Portuqaliya yığmasının heyətində Avropa çempionatının (2016), UEFA Millətlər Liqasının (2019) qalibi, həmçinin Avropa çempionatını gümüş (2004) və bürünc (2012), FIFA Konfederasiyalar Kubokunun (2017) bürünc mükafatçısı olub.
“Transfermarkt” internet-portalı 39 yaşlı veteran hücumçunun transfer dəyərini 15 milyon avro məbləğində qiymətləndirir.
