Portuqaliya yığmasının hücumçusu Kristiano Ronaldo Səudiyyə Ərəbistanının “Əl-Nəsr” klubunun heyətində növbəti matçına çıxıb.
Arena.az məlumat verir ki, ulduz futbolçu Səudiəyyə Ərəbistanı Peşəkar Liqasının 9-cu turu çərçivəsində “Əl-Hilal”la oyunun iştirakçısı olub.
Turun mərkəzi oyunu 1:1 hesablı heç-heçə ilə başa çatıb. “Nəcd cəngavərləri”nin portuqal hücumçusu və kapitanı Ronaldo bu oyunda məhsuldar fəaliyyəti ilə diqqət çəkməyib.
Oyunda hesab elə, 1-ci dəqiqədə açılıb. “Əl-Nəsr”in portuqal yarımmüdafiəçisi Otavio braziliyalı hücumçu Anderson Taliskanı zərbə mövqeyinə çıxarıb – 1:0. 49-cu dəqiqədə Taliska ikinci qolu vursa da, VAR müdaxiləsi ilə bu qol ləğv edilib. 77-ci dəqiqədə braziliyalı müdafiəçi Renan Lodi serb yarımmüdafiəçi Sergey Milinkoviç-Saviçi zərbə mövqeyinə çıxarıb və oyunda hesab bərabərləşib – 1:1. 89-cu dəqiqədə VAR “Əl-Hilal”ın lehinə təyin edilmiş penaltini ləğv edib. 1:1 hesabı ilə başa çatmış oyunda hakim futbolçulara ümumilikdə 9 sarı vərəq göstərib. Ronaldo da 45+1-ci dəqiqədə sarı vərəqə ilə cəzalanıb.
Oyun əzəli rəqiblərin qarşılaşması olaraq əlamətdar olub və rəqib tribunalar “Messi! Messi! Messi!” sədaları ilə “Əl-Nəsr” Ronaldonu qıcıqlandırmağa çalışıblar. Ronaldo təmkinini pozmadan, “əla” anlamını verən əl hərəkəti ilə tribunalara təbəssümlə qarşılıq verib.
Oyundan sonra isə Kristiano adəti üzrə “Əl-Nəsr”i ruhlandırıb: “Savaş hələ bitməyib. Bugünkü dəstəyiniz üçün hər kəsə təşəkkür edirik!”, – “Kriş” özünün rəsmi “X” sosial şəbəkə hesabı üzərindən paylaşıb.
“Hər iki komanda ilə də adil davran!”
Ulduz hücumçu həmçinin hakimlikdən narazılığını ifdə edib: “Biz üç sarı vərəqə gördük (birinci hissədə – redaktorun qeydi), “Əl-Hilal” isə vərəqə görmədi – sıfır. Hər iki komanda ilə də adil davran!” – “Daily Mail” dərgisi Ronaldonun hakimə ünvanladığı ismarışı sitat gətirir.
9 turdan sonra “Əl-Hilal” 25 xalla yarış cədvəlinin zirvəsində qərarlaşıb. “Əl-Nəsr” isə 19 xalla 3-cü pillədədir.
Kristiano Ronaldo 2023-cü ilin yanvar ayından “Əl-Nəsr”də çıxış edir. Portuqal ulduz ərəb klubuna 2023-cü ilin yanvarında “Mançester Yunayted”dən azad agent qismində keçib. Ronaldonun “Əl-Nəsr”lə müqaviləsi 2025-ci ilin iyun ayının sonuna qədər qüvvədədir.
Cari mövsümdə Ronaldo “Əl-Nəsr”in heyətində 13 oyuna 9 qol və 3 məhsuldar ötürmə ilə fərqlənib. Kristianonun “Əl-Nəsr” karyerası ümumilikdə 77 oyun, 67 qol və 18 məhsuldar ötürmədən ibarətdir.
Ronaldo “Əl-Nəsr”dən öncə “Real”, “Mançester Yunayted”, “Yuventus”, “Sportinq” (Lissabon) komandalarında çıxış edib. Portuqal ulduz bu komandaların hər biri ilə çoxsaylı qənimətlər qazanıb, müxtəlif rekordlara imza atıb. Ronaldo “Əl-Nəsr”lə də Ərəb Klublarının Çempionlar Kubokunu (2023) qazanıb, həmçinin Səudiyyə Ərəbistanı Peşəkar Liqasının 2023/2024-cü illər mövsümünün ən sərrast qolçusu (35 qol) olub.
Kristiano Portuqaliya yığmasının heyətində 216 oyuna 133 qol vurub və 45 məhsuldar ötürmə verib. Ronaldonun yığma komandanın heyətindəki oyun və qol sayı mütləq dünya rekordudur.
Ulduz futbolçu Portuqaliya yığmasının heyətində Avropa çempionatının (2016), UEFA Millətlər Liqasının (2019) qalibi, həmçinin Avropa çempionatını gümüş (2004) və bürünc (2012), FIFA Konfederasiyalar Kubokunun (2017) bürünc mükafatçısı olub.
“Transfermarkt” internet-portalı 39 yaşlı veteran hücumçunun transfer dəyərini 15 milyon avro məbləğində qiymətləndirir.
